Д.Нямсүрэн - "Дөрвөн цаг"

Баянхонгор аймаг Богд сум Богд уул

Бороо ганц нэг дуслах нь сайхан
Борог өвс норсон байх нь сайхан
Хаврын цас гэр лүү урсах нь сайхан
Хаа нэгтээ шувууд ганганах нь сайхан

Алтан хараацай дэргэдүүр нисэх сайхан
Аяны хүн манай уяанд буух сайхан
Айлын маань айлд бүсгүй байх сайхан
Айл нүүж ирэх сайхан.

Хангайн бороо гэнэт асгах нь сайхан
Харанхуйн дунд цахилгаан гялбах нь сайхан
Хонон өнжин бороо зүсрэх нь сайхан
Холоос гийчин ирэх сайхан.

Шаргал талын өвс халиурах нь сайхан
Шанхны үзүүрт салхи сэвэлзэх нь сайхан
Сартай шөнө бухал дээр унтах сайхан
Чамайг зүүдлээд, газарт ойчих сайхан.

Үе үе бороо амсхийх сайхан
Өлгөсөн цувнаас ус дусах нь сайхан
Үүлэн чөлөөнөөс нар гарах нь сайхан
Үүдээр болжморууд нисэн өнгөрөх сайхан.

Шөнө дөлөөр хүлэг морь янцгаах нь сайхан
Шүлэг нойрноос сэрж орчлонг бодох сайхан
Өрхний завсраар гэгээ орох сайхан
Өглөө болох сайхан.

Цайран цайран бороо орох нь сайхан
Цавьдар морьтой хүн наашаа давхих нь сайхан
Борооноос өмнө ирлээ гэж ярих нь сайхан
Боржгон эмээлээ аваад орж ирэх нь сайхан.

Хөх лонхон тогоруу дуугарах нь сайхан
Хөдөө цайдам борооших сайхан
Анирхан ахуйд цэцэг дохих сайхан
Аадрын өмнөх байдал сайхан.

Тооноор сар гэрэлтэх сайхан
Тогоотой сүүнд тусах сайхан
Шөнө орой гарах сайхан
Чөдөртэй морь тургилах сайхан.

Шиврэн шиврэн бороо орох сайхан
Ширэг зүлэг ногоорох сайхан
Зүүн өмнө солонго татах сайхан
Зүсэр бороо гэрэлтэх сайхан.

Гэгээн борооны усыг тосох сайхан
Гэзэг үсээ хүүхнүүд угаах сайхан
Агь хөмүүлийн үнэр сэнгэнэх сайхан
Аясхан бодол хол ойрыг санах сайхан.

Үдшийн бүрийгээр ирэх сайхан
Үүрийн гэгээгээр явах сайхан
Өнгөт дэлхий нь уяран уйлмаар сайхан
Өргөн хорвоо нь дуулан жаргамаар сайхан.

Эх нутаг минь шүлэг шиг сайхан
Эх орон минь дуу шиг сайхан
Эргэх дөрвөн цагт амьд явах сайхан
Эрээнцавд бороо орох сайхан.

ЛАОЗ - Афоризм

Аугаа их үйл хэрэг ямагт жижиг сажигхан зүйлээс эхэлдэг.
               *               *               *
Хүн амьдралд хэтэрхий их тэмүүлснээсээ болоод тун амархан үхчихдэг юм.
               *               *               *
Тэнгэрийн доор юм бүхэн ердөө л цаг зуурын төдий билээ.
               *               *               *
Бага юманд тэмүүлэх аваас түүнээ олж авна
Их юманд санаа хандуулваас төөрөгдөлд орно.
               *               *               *
Хүн анх төрөх үедээ энхрий зөөлөн, сул дорой байдаг.
Үхэл өөррүү нь довтлох бүрийд хатуу , чанга болсоор байдаг.
               *               *               *
Аливаа юмны хэмжээг мэддэг хүнд азгүй явдал тохиолддоггүй
               *               *               *
Юм мэддэг хүн нэг их яриад байдаггүй,
Ярьж байгаа хүн харин юм мэддэггүй байх нь олонтаа.
               *               *               *
Олон юм амалж байвал тэр итгэл даах хүн яавч биш
               *               *               *
Асар их ухаантай хүн бүтэлгүйтдэггүйн учир ердөө л юм бүрт хуруу дүрдэггүйнх
               *               *               *
Хэрэв хүмүүс чиний араас дагаасай гэж хүсч байвал, өөрөө тэдний араас яв.
               *               *               *
Үнэн үг уран гоё байдаггүй
               *               *               *
Өөрийнхөө бодол санааг хянаж бай,
тэр чинь ирээдүйд хийх үйлдлийн эхлэл
               *               *               *
Нас барсан мөртлөө мартагдаагүй хүн л мөнхийн хутгийг олмуй

О.Дашбалбар ″ Тэнгэр шиг бай ″

Хамаг бүгдээр чамайг
Харааж нулимж байвч, тэнгэр шиг бай!
Хамгийн сайн хүмүүс гэж
Хашгирч ерөөж байвч, тэнгэр шиг бай!
Тэвчээр барагдаж, нөхөд чинь орхивч
Тэнгэр шигбай, мөнхөд амгалан...
Тэргэнд суулгаж, алтан титэм өмсгөвч
Тэнгэр шиг бай, юу ч болоогүй юм шиг...

Б.Лхагвасүрэн: “Мартахуй”

Хаана ч дураараа исгэрэх
Салхинд би атаархдаг
Салхи эцдэгийг мартаад...

Хаашаа ч хамаагүй урсдаг
Усанд би атаархдаг
Ус ширгэдгийг мартаад...

Холын холд дуурьсах
Цуурайнд би атаархдаг
Эргэж ирдэггүйг нь мартаад...

Хоёр үзүүр нь энүүхэнд
Солонгонд би атаархдаг
Хоосон гэдгийг нь мартаад...

Арван тавны саран мандахад
Тунгалагт нь би атаархдаг
Үүлэнд хиртдэгийг нь мартаад...

Харамч - Сургамжит өгүүллэг

Настай өвөө залуугийн халаас руу бутархай мөнгө хийх зуураа:

-Бурхан намайг шинээр төрсөн юм шиг л баярлууллаа. Энэ өчүүхэн сэтгэлийн бэлгийг минь авбал бүр ч их баярлах болно гэв.

Залуу шан харамж авна гэдгээ, сайн үйл хийснээ өмнө ч мэдэж байлаа. Замын хажууд уйлан суух дөрөв таван настай хүүхэд төөрснийг мэдэж гэрийнх нь хаягийг асууж гэрт нь хүргэж өгчээ. Гэвч залуу хайсан гэрээ олоод замын турш төсөөлж байсан гаднаа усан сантай том харшийн оронд нэг муу модон байшин байсанд урам нь хугарав. Дээр нь бас хаалгыг нь хүүгийн өвөө тайлж, хүүг нэг сайн тэвэрч үнссэний дараа, залууд баярласнаа илэрхийлж халаас руу нь хэдэн зоос хийсэн нь тэр байжээ. Залуу, ярилцаж байхдаа хүүгийн эцэг эх авто машины ослоор хальсныг мэдлээ.Өвгөний өгсөн гурав дөрөвхөн бутархай мөнгө халаасных нь нэг буланг ч дүүргэхгүйд залуу, ядаж ийшээ ирсэн таксины мөнгийг өгсөн бол ч хэмээн бодно...

Л.Өлзийтөгс : Тэнгэрт ургадаг модод

Уучлахыг нь би мэддэг
Урвахыг нь та мэддэг
Уйлаад гуйх чинь худлаа байдаг ч
Унахад чинь би таны төлөө залбирдаг

Өгөх л гэж өгсөн бие минь
Авах л гэж авсан та минь
Өшрөөд уйлах минь үнэн байдаг ч
Үнсэхэд чинь л би нулимастай инээж эргэдэг

Хайрлахыг нь би мэддэг
Халгихыг нь та мэддэг
Харцаа нуугаад худлаа байдаг ч
Халтирахад чинь би таны төлөө өвддөг

Зовох л гэж зольсон бие минь
Зовоох л гэж учирсан та минь
Зоргоор одохдоо хүнийх байдаг ч
Зориод ирэхдээ минийх л байдаг

Өө, яана гэх вэ?
Өгөх л гэж өгсөн...

Дейл Карнеги: Гомдоож дургүйцэл төрүүлэхгүйгээр хүмүүсийг өөрчлөх арга

1. Магтаал, үнэн сэтгэлийн талархалаас яриагаа эхлэ!
2. Өөрийнх нь алдааг шууд битгий хэл
3. Бусдыг шүүмжлэхээсээ өмнө өөрийн дутагдалаа дурьд
4. Тушаахын оронд асууж бай
5. Бусдад нэр төрөө хамгаалах бололцоо олгож бай
6. Хүнийг гомдоож жигшээхгүйгээр өөрчлөхийн тулд өчүүхэн ололт олоход нь магтаж бай
7. Хүнийг сайн тийш нь өөрчлөхийн тулд та уг хүнд бий болгохыг хүсэж буй тэр шинж чанарууд аль хэдийнээ өөрт нь байгаа мэтээр харьц
8. Аль болохоор урамшуул. Гаргасан алдааг нь залруулж амархан засаж болно гэдэгийг түүнд ойлгуулж таны хүсэж байгаа шиг болоход тийм ч хэцүү биш гэдэгийг түүнд итгүүл
9. Хүссэн зүйлийг тань хүмүүс дуртайяа хийхээр та тэдэнд хандаж бай

"Нөхдөө өөртөө татаж хүмүүст нөлөөлөх ёсон" номын тэмдэглэл

Тахиа болсон бүргэд - Сургамжит өгүүллэг

Фред бүргэд өндөг байхдаа үүрнээсээ өнхрөн унахад нэгэн тариачин түүнийг олоод тахианыхаа өндөгнүүдтэй нийлүүлчихжээ. Хэдхэн хоногийн дараа Фред өндгөө хагалан ертөнцийг анх харж. Эргэн тойронд нь өөртэй нь адилхан дэгдээхэйнүүд шавар шавхайтай хутгалдан, өт хорхой эрж, тэжээл буудайнаас тоншин гүйлдэж байв.
Фред царай зүсээ хэзээ ч хараагүй болохоор өөрийгөө бас л тэдний адил хэмээн бодлоо. Гэвч түүний хоншоор нь тахир учир өд будаа тоншиход зохицохгүй, бас тэгээд будаа идэхэд гэдэс нь гүйлгэнэ. Түүний хөл нь богино учир хурдан гүйх боломжгүй. Түүний далавч бусдаас илү урт тул дэгдээхэйний торонд орооцолдоод байв...

Дейл Карнеги: Маргаанд ялах цорын ганц арга бол түүнээс зайлсхийх. Хурцадмал байдлаас ямагт зайлсхийж бай

1. Маргаанд ялах цорын ганц арга бол түүнээс зайлсхийх. Хурцадмал байдлаас ямагт зайлсхийж бай
2. Маргаад өрсөлдөгч чинь хэзээ ч танд хэзээ ч сайн болохгүй тул маргаанд дийлэх нь ашиггүй ялалт байх болно
3. Ямар нэгэн зүйлийг батлах гэвэл мартсан зүйлийг нь сануулж буй мэтээр хэлж өгч бай
4. Чадвал бүхнээс ухаантай бол харин энэ тухайгаа бүү ярь Честерфилд
5. Ярилцагч хүнийхээ бодлыг хүндэлж бай. Таны буруу гэж хүнд хэзээ ч бүү хэл
6. Хэрэв буруутай бол үүнийгээ эрс шууд хүлээгтүн
7. Сайн санаа, найрсаг хандлага, талархал нь уур хилэнгээс хурдан хүмүүсийн санаа бодлыг өөрчилнө
8. Хэн нэгэнтэй ярилцахдаа санал зөрсөн бус, санал нийлсэн асуудлаас эхлэгтун
9. Ярилцагчаасаа аль болох ТИЙМ гэсэн хариулт ав
10. Хэрэв та дайсантай болохыг хүсвэл нөхдөө давж гарахыг хичээ, Харин анд нөхөдтэй болохыг хүсвэл тэдэнд таныг давж гарах боломж олго. Ларошфуко
11. Өөрөө бага ярьж бусдад илүү их ярих боломж олго
12. Хүмүүс санаа бодлыг тань дэмжээсэй гэж хүсвэл: Уг санааг өөрөө гаргасан мэтээр ярилцагч хүн чинь бодож байг
13. Гол мөрөн далай тэнгис уулын горхиор тэжээгдэж байдгийн учир нь тэд горхиноос доогуур төвшинд байдагт оршино
14. Аливааг ярилцагч хүнийхээ нүдээр хар
15. Бусдын санаа бодол хүсэл эрмэлзлэлд ойлгож ханд
16. Хэрэв хүмүүс таны санаа бодлыг дагаасай гэж хүсвэл: Шударга сэдлийг хөгжөөх нь чухал
17. Өөрийнхөө зөв болохыг нотлохдоо үзүүлэн таниулах арга ашигла
18. Цалин, зөвхөн цалингийн тусламжтайгаар хэрэгтэй хүнээ ажилд авах эсвэл барьж байх боломжгүй. Махрах хорхойтох явдал чухал ач холбогдолтой Файрстоун
19. Зоригтой хүнийг ажилд авах бол түүнийг өд, зөвхөн тэр л энэ ажилд тохирохыг ойлгуул

"Нөхдөө өөртөө татаж хүмүүст нөлөөлөх ёсон" номын тэмдэглэл

Дейл Карнеги: Хүмүүстэй харилцах нууцууд

1. Бусад хүмүүсийн хувь заяаг үл сонирхсон хүн амьдралдаа ихээхэн бэрхшээл туулдаг бөгөөд бусдад багагүй хор хүргэдэг юм. Ийм хүмүүсээс болж зовлон учирдаг. Альфред Адлер
2. Хүмүүст таалагдахыг хүсвэл тэднийг үнэн сэтгэлээсээ сонирх
3. Таны аз жаргал та аливаа зүйлийг хэрхэн үнэлж буйгаар тодорхойлогдоно
4. Инээмсэглэл
5. Хүмүүсийн нэрийг сайн тогтооно гэдэг маш том давуу тал түүнийгээ хөгжүүл! Харин мартана гэдэг өөрөө мартагдана гэсэн үг
6. Сайн ярилцагч байхыг хүсвэл сайн сонсогч байгтун
7. Сонирхолтой байхын тулд сонирхож чаддаг байх хэрэгтэй
8. Ярилцаж байгаа хүндээ онцгой анхаарал хандуул. Анхаарал шиг ярилцагчийг хөхүүлэх зүйл үгүй
9. Зөвхөн өөрийнхөө тухай ярьдаг хүн зөвхөн өөрийнхөө тухай боддог. Зөвхөн өөрийнхөө тухай боддог хүн найдваргүй хувиа хичээгч ямар ч боловсролтой байлаа гэсэн огт хүмүүжилгүй хүн байдаг
10. Ярилцагч хүнийхээ сонирхдог зүйлийн талаар яриа үүсгэ
11. Бусад хүн таны төлөө хийгээсэй гэж хүссэн тэр бүх зүйлийг бусдын төлөө хийгтүн
12. Ярьж байгаа хүнийхээ үнэ хүндтэйг ухамсарлаж байгаагаа итгүүлэхдээ чин сэтгэлээсээ ханд! 

"Нөхдөө өөртөө татаж хүмүүст нөлөөлөх ёсон" номын тэмдэглэл